आठ वर्षसम्म बनेन कान्द्रा नदीको पुल

धनगढी ।  कैलालीको हुलाकी सडक खण्डअन्तर्गत भजनी नगरपालिकास्थित कान्द्रा नदीको पुल निर्माण ८ वर्षसम्म पूरा हुन सकेको छैन ।

ठेकेदारको लापरबाहीका कारण पुल बन्न नसकेको हुलाकी सडक आयोजनाले जनाएको छ । ‘४ वर्षमा निर्माण गरिसक्ने पर्ने पुल ८ वर्षसम्म पूरा हुन सकेको छैन,’ हुलाकी सडक आयोजना धनगढीका इन्जिनियर पदम मडैले भने, ‘यसमा ठेकदारको लापरबाही छ ।’

उनका अनुसार पुलको एउटा पिल्लरको डिजाईन परिवर्तन गरिनुपर्ने भएपछि  सडक आयोजनाले नै एक वर्ष म्याद थप गरेको थियो । तर, सो समयमा ठेकेदार कम्पनीले पुल निर्माण सम्पन्न गर्न सकेन । त्यसपछि २ पटक म्याद थप गर्दासमेत पुल निर्माण हुन नसकेपछि सडक निर्माणमा बाधा पुगेको छ । 

०७१ सालमा हुलाली सडक आयोजना र लामा, साल्पा छर्पा कन्ट्रक्सने जेभिबीच ४ वर्षमा पुल निर्माण गरी सक्ने गरी सम्झौता भएको थियो । ४ करोड ४२ लाखमा ठेक्का पाएका भएको पुल असार ०७५ सम्म निर्माण सम्पन्न गरिसक्नु पर्ने सम्झौता भएको थियो ।

तोकिएको मितिमा पुल नबनेपछि अन्तिम पटकका लागि चैत २०७८ सम्मका लागि पुल निर्माण म्याद थप गरेको छ । सो समयमा पुल निर्माण नभए ठेक्का सम्झौता तोडिने र ठेकेदार कम्पनीलाई कालो सूचीमा राख्न प्रक्रिया अगाडि बढाइने इन्जिनियर मडै बताउँछन् ।

‘ठेकदार कम्पनीले चैतसम्म पुल निर्माण गरी सक्ने प्रतिबद्धता जनाएको छ,’ इन्जिनियर मडैले भने, ‘यदि चैतसम्म पुल बनेन भने ठेक्का सम्झौता तोडेर ठेकदारलाई कालोसूचीमा राख्ने प्रक्रिया अघि बढाइनेछ ।’ 

© 2021 Quicknepal.com  |  All Rights Reserved.